800 føroyingar sameinaðust um at rudda 30 tons í september 2023
Eins og undanfarin ár vóru vit ein partur av altjóða ruddingini hjá felagsskapinum World Cleanup Day tann 16. september 2023. 19 milliónir fólk í 198 londum ruddaðu heili 219.000 tons av ruski. Í Føroyum ruddaðu eini 800 fólk uml. 12 tons av ruski.
Vit í Rudda Føroyar takka øllum, sum á ein hvønn hátta góvu sítt íkast til ruddingarátakið í 2023.
Fyri at fáa ymsu partarnar av landinum umboðaðar, tørvaði okkum lokalar samskiparar, sum kundu taka sær av uppgávum og fyrireikingum í sínum nærumhvørvi. Leitanin varð sett í verk á sosialu miðlunum, har vit funnu fram til fleiri tøkar og ídnar samskiparar. Tað vísir seg tó at ganga striltið at fáa alt landið umboðað, men vit missa ikki mótið og vóna, at fleiri leggjast afturat.
Tykkum, ið tóku uppgávuna á tykkum til ruddingina í 2023 og gjørdu eitt megnararbeiði, takka vit fyri samstarvið og fyri, at tit tóku uppgávuna á tykkum.
Vælkomin, Annika!
Undanfarin ár hava vit havt ein høvuðssamskipara í starvi frá uml. mai til oktober. Hetta hava vit broytt. Í november 2023 settu vit Anniku Arnsteinsdóttur Nielsen í eitt hálvtíðarstarv, so vit kunnu arbeiða meira miðvíst við teimum málum, vit seta okkum. Starvið er tó treytað av, at vit fáa nøktandi fígging í 2024. Annika er harumframt ein av nevndarlimunum í Rudda Føroyar.
Í 2020 skuldu vit skipa fyri temadegi saman við Norðurlandahúsinum við heitinum ”Burðardyggir vanar”. Alt var fyrireikað og klárt til dagin, sum skuldi vera tann 12. mars, tá ið alt samfelagið bleiv niðurlæst. Nú er avgjørt at skipa fyri einum líknandi tiltaki tann 2. september í ár; meira kunning um hetta kemur, sum árið líður.
Týdningarmiklan leiklut í norðurlendskum samstarvi
Í august 2023 fingu vit forkunnuga vitjan av felagsskapunum Hold Norge Rent og In The Same Boat, sum eru tveir norskir felagsskapir, ið arbeiða fyri einum reinari Noregi.
Hold Norge Rent er ein felagsskapur líknandi Rudda Føroyar, men væl størri og við fleiri resursum. Tann 21. august fóru vit saman við teimum at rudda fjøruna á Skipanesi, og har var ikki smávegis at finna. Norsku gestirnir vóru serliga bilsnir yvir mongu spreingikaðlarnar, sum sløddust mestsum allastaðni. Talan var um einar 100 metrar av sjóvarmálanum, sum varð ruddað, og tilsamans 260 kilo av ruski bleiv tikið upp.
Rudda Føroyar er eisini partur av norðurlendska felagsskapinum Nordic Coastal Cleanup. Í oktober í fjør vóru Annika og Beinta, umboðandi Rudda Føroyar, á fundi í Keypmannahavn saman við umboðum fyri hini feløgini í felagsskapinum.
Stríðast móti havdálking
Havburturkast er ein av heimsins størstu umhvørvishóttanum, og seinastu árini eru bæði vitanin og tilvitanin um trupulleikan økt um allan heimin eins og í Norðurlondum. Hvørt ár enda stórar mongdir av burturkasti í havinum og reka fram við strondum, oyggjum, upp á sandin, oman á vatnskorpuni á havinum og leggjast á havbotnin. Vøtn og vatnleiðir eru eisini ávirkað. Fyri at fáa tamarhald á trupulleikanum má heimurin seta fokus á fyribyrging av burturkasti og á uppruddingarátøk. Høvuðsendamálið við Nordic Coastal Cleanup, norðurlendsku strandaruddingini, er at savna sjálvboðin og at rudda burturkastið við strendurnar og inni í landinum, fram við áum og vøtnum um øll Norðurlondini.
Vit royna eisini at finna manglandi vitanina um keldurnar til havburturkastið í Norðurlondum við strandaeftirliti og at savna hagtøl.
Tann 24. mai fara vit at skipa fyri strandarudding saman við Tórshavnar kommunu.
Altjóða talgildur ruddingardagur
Á hvørjum ári í mars er altjóða talgildur ruddingardagur, sum Rudda Føroyar setur eisini sjóneykuna á. Tá heita vit á fólk um at rudda á elektronisku tólum sínum.
Í talgilda “heiminum” finst, eins og í fysiska heiminum, ein rúgva av óruddi, sum upptekur
pláss á okkara fartelefonum, teldum og servarum. Um vit strika alt óneyðugt innihald, sum upptekur pláss, kunnu vit minka sera nógv um okkara CO2-slóð, tí internetið og alskyns cloud-skipanir dálka eins nógv og flogferðsla.
Lesandi uttanlands áhugað í okkara arbeiði
Tað vísir seg, at tað er ikki bara herheima, at fólk kenna Rudda Føroyar.
Devin, ein írskur næmingur á universitetinum í Dublin, fann heimasíðuna hjá Rudda Føroyar. Hann vildi fegin sleppa í starvsvenjing og fer at arbeiða hjá felagsskapinum í seks vikur í mai-juni. Hann fer m.a. at kanna somu strond og at gera eina skráseting hvørja viku og kanna, hvat slag av burturkasti liggur har ella kemur hagar. Hann skal eisini gera samrøður við ymisk fólk runt um landið og framleiða enskt tilfar til okkara heimasíðu.
Ein lesandi úr Týsklandi, sum nú skrivar høvuðsuppgávu á universitetinum á Ísafirði í Íslandi, og í uppgávuni samanber m.a. plastdálking í Íslandi, Noregi, Grønlandi og Føroyum, vendi sær til Rudda Føroyar. Hon spurdi, um hon kundi gera samrøðu við felagsskapin um hetta evnið.
Framhaldandi gott samstarv við kommunur og IRF
Í 2023 høvdu vit eins og hini árini eitt gott samstarv við kommunurnar, sum m.a. ger, at burturbeiningin kann fara fram í samstarvi við IRF og kommunalu brennistøðina hjá Tórshavnar kommunu uttan hóvasták og uttan kostnað fyri Rudda Føroyar.
Samanumtikið er Rudda Føroyar ein áminning um, hvussu stóra byrðu vit kunnu lyfta, um vit samstarva – ruddingar bøta um støðuna her og nú, men hugburðsbroytingar og endurhugsan skulu til fyri at menna okkara samfelag, so dálking verður søga.
Nýggjan grafiskan samleika
At enda skulu vit avdúka, at Rudda Føroyar fær nýggjan samleika, eitt nýtt búmerki, sum Høgra hevur sniðgivið, og tað sær soleiðis út.
Í búmerkinum hava vit savnað saman nakrar skaddar bókstavir og sett teir saman til eina sermerkta heild. Ruskið, sum er savnað saman, verður nýnýtt. Líka sum við nýnýtslu skilir hetta búmerkið seg úr mongdini og fær teg at undrast. Og tú kanst tulka búmerkið á ymsan hátt. U’ið kann brúkast sum ein ruskspann, og O’ið kundi verið heimurin, sum vit skulu halda hondina undir og so framvegis. Litirnir eru blátt og grønt.
Fíggjarligur stuðul í 2023
Felagið hórar ikki undan uttan fíggjarligan stuðul, so eins og undanfarin ár bleiv søkt um fíggjarligan stuðul, og hava hesi stuðlað arbeiði okkara í 2023:
- Hiddenfjord
- Betri
- Articon
- Lív
- Elektron
- Føroya Tele
- Bank Nordik
- Faroe Ship
- Hotel Hafnia
- Framherji
- Varðin
- Skansi Offshore
- Formula
- Maretec Consulting
- Estra
Vit takka hjartaliga fyri stuðulin.
Eisini stóra tøkk til Niels Mellemgaard, ið umsitur heimasíðuna.
Kom við okkum!
Til ber at fara inn á heimasíðuna at boða frá dálking:
Boða frá dálking – Rudda Føroyar (ruddaforoyar.fo)
Eisini ber til at tekna seg sum lokalsamskipara umvegis heimasíðuna
Lokalsamskiparar – Rudda Føroyar (ruddaforoyar.fo)
Allur stuðul er kærkomin! Vit hava kontu í:
Betri Banka: 9181 5168602