Vit dálka Føroyar hvønn einasta dag

– Tíverri síggja vit burturkast allastaðni í náttúruni; í fjøruni, í haganum, millum hús og fram við vegunum. Hetta er ikki í lagi, tí tað dálkar umhvørvið og misprýðir okkara vakra land, sigur Sigrún Mohr, forkvinna í Rudda Føroyar.

Felagsskapurin hevur í átta ár arbeitt miðvíst við at skapa betri umhvørvisligt medvit og hava á hvørjum ári í september skipað fyri felags ruddingartiltøkum kring landið. Úrslitini hesi átta árini, síðan felagsskapurin var stovnaður, eru týðilig: Meir enn 100 tons av burturkasti eru tikin úr føroysku náttúruni. Seinnu árini er virksemið hjá felagsskapinum eisini vaksið, og skipað verður fyri fleiri árligum ruddingum, millum annað á útoyggj. Betri-samtakið hevur verið stuðlandi samstarvspartur hjá Rudda Føroyar, síðan átakið byrjaði í 2018. Nú hevur Betri-samtakið gjørt av at styrkja og formliga seta karmarnar um samstarvið.

Vaksandi áhugi

Áhugin fyri arbeiðinum at rudda er vaksandi. Bæði einstaklingar, skúlar, feløg og fyritøkur hava tikið væl undir við átakinum, og vanliga eru yvir 1.000 luttakarar við í árligu ruddingunum kring landið. Hetta vísir, at fólkið í Føroyum vil gera mun.

– Stuðulin ger, at Rudda Føroyar fær møguleika at menna arbeiðið víðari, styrkja átøkini og náa enn longur út til borgarar og fyritøkur. Málið er greitt: einar reinari Føroyar fyri okkum øll og komandi ættarlið, sigur Sigrún Mohr, forkvinna.

Rudda Føroyar heitir á bæði einstaklingar og fyritøkur um framhaldandi at taka lut í ruddingarátøkunum og vera við til at verja okkara náttúru.

Á myndini eru frá Betri Stuðul: Evy Jacobsen, forstjóri Betri p/f, og Barbara á Tjaldrafløtti, leiðari.
Frá Rudda Føroyar: Sigrún Mohr, forkvinna, Elin Lindenskov, nevndarlimur, og Annika Arnsteinsdóttir Nielsen. nevndarlimur og samskipari.

Tórshavn 1. juli 2026

The post Betri-samtakið høvuðsstuðul hjá Rudda Føroyar appeared first on Rudda Føroyar.

Marint burturkast ferðast um stranda- og landamørk og krevur tí eitt felags samskipað átak. Nordic Alliance on Marine Litter fremur júst hetta og stuðlar á hendan hátt eina meira vitanargrundaða tilgongd til evnið.

Hóast navnið á netverkinum er nýtt, so eru limalondini tey somu:
Hold Norge Rent (Noreg), #HållSverigeRent (Svøríki), #RenNatur (Danmark), #PidäSaaristoSiistinäry (Finnland), #HållSkärgårdenrenrf (Áland), #RuddaFøroyar (Føroyar), #WorldwideFriends Veraldarvinir (Ísland) og #CSRGreenland (Grønland).

The post Nordic Coastal Cleanup (NCC) skiftir navn til Nordic Alliance on Marine Litter appeared first on Rudda Føroyar.

Felagið var stovnað í 2018. Sostatt var hetta 8. ferð, at vit vóru partur av altjóða ruddingini hjá felagsskapinum World Cleanup Day tann 20. septembur 2025, tá ið 25 milliónir fólk í 212 londum ruddaðu 205.000 tons av ruski.

Enn er langt á mál, tí málið hjá WCD er, at 5% av heimsins borgarum skulu rudda henda dagin, tað eru á leið 400 mill. fólk. Stuttligt hevði verið, um vit kanska sum fyrsta landið kundi nátt málinum, at uml. 2.750 fólk fóru at rudda tann 20. septembur í 2026.

Týdningarmiklan leiklut í norðurlendskum samstarvi

Rudda Føroyar er eisini partur av norðurlendska felagsskapinum Nordic Coastal Cleanup, sum er samstarv millum Grønland, Ísland, Finnland, Áland, Svøríki, Noreg, Danmark og Føroyar. Endamálið er, at vit saman eggja til hugburðarbroyting viðvíkjandi umhvørvi, dálking og endurnýtslu, sjálvbodna rudding og yvirskipað arbeiða fram móti minni ruski og burturkasti í sjónum.
Havburturkast er ein av heimsins størstu umhvørvishóttanum, og seinastu árini eru bæði vitanin og tilvitanin um trupulleikan økt um allan heimin eins og í Norðurlondum.
Í mai vóru Strandaruddingar í Tórshavnar kommunu í samstarvi við NCC:

– Havstovan ruddaði Yviri við Strond
– Tórshavnar kommuna ruddaði í Kaldbaksbotni
– Umhvørvisstovan ruddaði Sugguna í Kirkjubø.

Í oktober í fjør vóru Annika og Beinta, umboðandi Rudda Føroyar, á fundi í Keypmannahavn saman við umboðum fyri hini feløgini í felagsskapinum Nordic Coastal Cleanup.

Vit eru eisini farin í samstarv við Sjúrð Hammer og felagsskapin Arctic Monitoring Assessment Programme (AMAP).

Økini, vit rudda, eru:
– Søltuvík á Sandi
– Suggan í Kirkjubø og
– Mølin á Eiði.

Vit rudda og skráseta tríggjar ferðir um árið – í februar, apríl og august.

Samstørv
Í samstarvi við Greengate hava ferðafólk ruddað tvær ferðir í Kaldbaksbotni og í Sugguni í Kirkjubø.

Ein týðandi partur av arbeiðinum var at styrkja samstarvið kring landið. Annika, samskipari okkara, vitjaði kommunur, skúlar og ferðavinnuna fyri at fyrireika og menna ruddingardagarnar bæði um várið og um heystið.

Vit hava havt fundir við Náttúrutingið og við FNU.

Í undirvísingarhøpi varð eisini gjørt eitt átak á Glasi, har næmingar ruddaðu, skiltu rusk og arbeiddu við framløgum um dálking.

Rudding í Skúvoy
Leygardagin 16. august skipaði Rudda Føroyar fyri rudding í Skúvoy í samstarvi við Visit Sandoy, Jóanisi í Hoygarðinum, borgarstjóra og bónda í Skúvoy, og Atlantic Airways. Umleið 20 fólk vóru við, og saman megnaðu vit at rudda upp í 9 stórar tonsasekkir og 4 net. Tyrlan hjá Atlantic Airways heintaði posarnar og fleyg teir til Sands. Høvuðsuppgávan var at taka niður gamalt hegn og hegnpelar í haganum. Eitt risaarbeiði, men tað ger stóran mun fyri hagan og lendið í Skúvoy, og ikki minst, at vit, ið vóru komin til oynna at rudda, fingu eina sera góða móttøku og eina góða uppliving.

Altjóða talgildur ruddingardagur

Á hvørjum ári í mars er altjóða talgildur ruddingardagur, sum Rudda Føroyar eisini setur  sjóneykuna á. Tá heita vit á fólk um at rudda á elektronisku tólum sínum.

Í talgilda “heiminum” finst, eins og í fysiska heiminum, ein rúgva av óruddi, sum upptekur
pláss á okkara fartelefonum, teldum og servarum. Um vit strika alt óneyðugt innihald, sum upptekur pláss, kunnu vit minka sera nógv um okkara CO2-slóð, tí internetið og alskyns cloud-skipanir dálka eins nógv og flogferðsla.

Dálkingarfáboðanir
Av og á venda fólk sær til okkara við fráboðan um dálking í náttúruni, og tá eru tað ofta øki, sum eru illa dálkað. Slíkar fráboðanir ”víðarisenda” vit vanliga til ta kommununa, har óruddið liggur, ella til Heilsufrøðiligu starvsstovuna.

Framtíðarynski
Fyri at vit kunnu arbeiða meira miðvíst við teimum málum, vit seta okkum, er umráðandi at hava neyðugu arbeiðsorkuna. Í verandi løtu hevur Rudda Føroyar eitt starvsfólk í hálvtíðarstarvi. Hetta hevur verið eitt týðandi grundarlag fyri at samskipa arbeiðið og tryggja framhaldandi virksemi. Arbeiðsøkið hjá felagnum er tó økt munandi seinastu árini, bæði í mun til tiltøk, samskifti, samstarv og ítøkiliga rudding kring landið. Við verandi starvsorku er avmarkað, hvussu nógv kann fremjast í verki. Tí er eitt greitt ynski at styrkja um starvsorkuna, soleiðis at møguligt verður at seta eitt starvsfólk afturat í hálvtíðarstarv. Hetta hevði givið felagnum betri møguleikar at:

– framt fleiri ruddingartiltøk kring landið
– styrkt samskifti og upplýsandi arbeiði
– ment samstarv við kommunur, feløg og sjálvboðin og at
– tryggja betri fyriskipan og uppfylging av verkætlanum

Ein slík styrking hevði gjørt arbeiðið hjá felagnum meira ítøkiligt og økt um ávirkanina í stríðnum móti ruski í náttúruni. Samstundis hevði ein slík styrking eisini verið við til at skapt betri arbeiðsumstøður og virkað motiverandi fyri verandi starvsfólk.

Um vit taka samanum, er støðan tann, at tørvur er framvegis á felagsskapinum Rudda Føroyar. Hóast vit og mong við okkum gera eitt stórt arbeiði við at rudda, síggja vit, at nógv framvegis órudda. Tí er avbjóðingin frameftir ikki bara at rudda, men at fáa fólk at broyta hugburð, so vit í størri mun taka felags ábyrgd av umhvørvinum.

Í 2025 høvdu vit eins og undanfarin ár gott samstarv við kommunurnar, sum m.a. ger, at burturbeiningin kann fara fram í samstarvi við IRF og kommunalu brennistøðina hjá Tórshavnar kommunu uttan hóvasták og uttan kostnað fyri Rudda Føroyar. Eins og vit hava sagt áður, so er Rudda Føroyar ein áminning um, hvussu stóra byrðu vit kunnu lyfta, um vit samstarva – ruddingar bøta um støðuna her og nú, men hugburðarbroytingar og endurhugsan skulu til fyri at menna okkara samfelag, so dálking verður søga.

Vit í Rudda Føroyar takka øllum, sum á ein hvønn hátt góvu sítt íkast til ruddingarátakið í 2025. Uttan fíggjarligan stuðul hóra vit ikki undan, so eins og undanfarin ár bleiv søkt um stuðul, og hava hesi stuðlað arbeiði okkara í 2025:

• Betri og Hiddenfjord, høvuðsstuðlar okkara
• Mowi
• Djóraansing við Hildigarð
• Høgra
• SNA
• Tórshavnar kommuna
• Articon
• SEV
• Christian í Grótinum
• Framherji
• Varðin
• IRF
• Kommunala brennistøðin
• Hotel Brandan
• BASE
• Formula
• Runavíkar kommuna
• Atlantic Airways
• Nordic Coastal Cleanup (NCC)

Vit takka hjartaliga fyri stuðulin.

Eisini ein tøkk til Niels Mellemgaard, ið umsitur heimasíðuna hjá okkum!

Til ber at fara inn á heimasíðuna at boða frá dálking:
Boða frá dálking – Rudda Føroyar (ruddaforoyar.fo)

Eisini ber til at tekna seg sum lokalsamskipara umvegis heimasíðuna
Lokalsamskiparar – Rudda Føroyar (ruddaforoyar.fo)

Allur stuðul er kærkomin! Vit hava kontu í:
Betri Banka: 9181 5168602

The post Ársfrágreiðing 2025: 21 tons av ruski ruddað úr náttúruni appeared first on Rudda Føroyar.

Skrá sambært viðtøkum felagsins.

Øll eru vælkomin á fund, og eisini at koma upp í felagsskapin so ella so.

– Nevndin

The post Aðalfundur 2026 🌱 appeared first on Rudda Føroyar.

Føroyar vóru aftur í ár partur av altjóða tiltakinum World Cleanup Day, og úrslitið var imponerandi: 880 fólk ruddaðu tilsamans 17 tons av burturkasti. Tað er stór framgongd samanborið við í fjør, tá 2 tons vóru tald upp.

Ruddingardagurin varð hildin leygardagin 20. september 2025 og dagarnar rundanum, við luttøku um alt landið – úr Klaksvík og suður til Trongisvágs og úr Vágunum eystur til Nólsoyar. Og á Sandi og meginøkinum var luttøkan eisini góð.

Bæði stórt og smátt varð ruddað, alt frá smáum plastlutum til størri burturkast sum dekk og jarn. Ruddað varð bæði á landi og á sjógvi, og luttakararnir vóru bæði børn og vaksin.

Summar ruddingar vóru samskipaðar av Rudda Føroyar, meðan aðrar vórðu settar í verk av einstaklingum, feløgum og fyritøkum.

Høvuðssamskipari okkara er Annika Arnsteinsdóttir Nielsen, sum hevur staðið fyri samskipanini og samskiftinum við ruddarar og samstarvsfelagar.

Vit takka kommununum fyri gott samstarv og fyri at taka sær av burturbeiningini, og IRF og kommunalu brennistøðunum fyri at taka ímóti ruskinum. Eisini vilja vit senda eina hjartans tøkk til allar einstaklingar, skúlar, dagstovnar, fyritøkur, feløg og stovnar, ið hava ruddað ella stuðlað á annan hátt

Eisini stóra tøkk til stuðlarnar, ið gera ruddingardagin møguligan:

• Hiddenfjord – høvuðsstuðul okkara aftur í ár; starvsfólkini rudda eisini sjálv hvørt ár
• Betri
• Sjógæti
• MBM
• Tórshavnar kommuna
• Runavíkar kommuna
• Sands kommuna / Visit Sandoy
• Nomatek
• Selmar Nielsen Arkitektar
• Høgra
• Christian í Grótinum
• Framherji
• Varðin
• SEV
• Articon
• Atlantic Airways
• Tryggingarfelagið Lív
• MOWI
• Djóraansing við Hildigarð
• Formula
• NCC
• BASE

Vit gleðast um stóru luttøkuna og góða úrslitið í ár – við vón um reinari náttúru í 2026

Blíðar heilsanir
Nevndin í Rudda Føroyar

Mynd: Jørgen Neshamar Asmussen

The post 17 TONS RUDDAÐ Í ÁR ♻️ appeared first on Rudda Føroyar.

Ein almenn áheitan frá Føroya Náttúru- og Umhvørvisfelag, Rudda Føroyar og Føroya Fuglafrøðifelag:

Ein vaksandi trupulleiki

Á keiini á Eiði verða aliringar til alivinnuna framleiddir. Hetta arbeiðið hevur í fleiri ár ført við sær álvarsliga plastdálking, og borgarar í bygdini hava gjørt vart við trupulleikan ferð eftir ferð.

Framleiðslan av aliringum á Eiði byrjaði fyri umleið 25 árum síðani…

Les meira á fnu.fo

The post Plástdálking: Eitt álvarsligt umhvørvismál appeared first on Rudda Føroyar.

Í samstarvi við Visit Sandoy, Jóanis í Hoygarðinum, borgarstjóra og bónda í Skúvoy, og Atlantic Airways skipa vit fyri ruddingartiltaki í Skúvoy.

Leygardagin 16. august fara vit at taka burtur gamalt rustað hegn og hegnpelar. Tað verður ein hugnalig og forkunnug útferð, og samstundis gera vit ein góðan innsats fyri náttúruna

Ferðing Sildberin siglir av Sandi kl. 08:30 og úr Skúgvi aftur kl. 18:45. Pláss er fyri 40 vaksnum fólkum (aldursmark: 14 ár).

Uppgávan

Vit leggja dent á niðurdottið hegn og hegnpelar henda dagin. Tú skalt hava egnar handskar við. Best er, um tú ert koppsett/-ur fyri stívkrampa.

Gisting

Um tú hevur hug at vera í Skúvoy til sunnudag, ber til at gista ókeypis í gamla skúlanum – tær nýtist bara at hava soviposa, handklæði o.l. við.

Matur

Matur er íroknaður leygardagin – Jóanis í Hoygarðinum, bóndi, bjóðar.

Melda til nú við at senda teldupost til: info@visitsandoy.fo

The post Kom við og rudda Skúvoy 🌱 appeared first on Rudda Føroyar.

Samanumtikið er nevndin væl nøgd við árið 2024, og vit umrøddu eisini ætlanir fyri komandi árið. Les ársfrágreiðingina 2024 hjá Rudda Føroyar her.

Nevndin skipaði seg soleiðis:

Sigrún Mohr, forkvinna Sissal Carlsdóttir á Lag, næstforkvinna og skrivari Elin Lindenskov, kassameistari Annika Arnsteinsdóttir, nevndarlimur Beinta Gaard Davidsen, nevndarlimur Hildigarð Djurhuus Hansen, nevndarlimu

The post Aðalfundur 2025: Nevndin hevur skipað seg appeared first on Rudda Føroyar.

Arbeiðið at avmarka og skerja dálking og at rudda náttúruna hevur ment seg, bæði við nýggjum tiltøkum, samstørvum og einari styrktari sjónligari og talgildari tilveru. Vit hava tikið stig til fleiri ruddingartiltøk, bæði lokalt og í samstarvi við altjóða felagsskapir, og vit hava lagt dent á at broyta vanar og at varpa ljós á týdningin av at verja umhvørvið.

Frambrot og fjølbroytt átøk

Tann 2. september varð skipað fyri temakvøldi í Norðurlandahúsinum. Evnið var at broyta vanar, endurnýta meira og tveita minni burtur. Hetta tiltakið var ein liður í at varpa ljós á yvirskipaða endamálið hjá Rudda Føroyar at fáa ein reinan, sunnan og ruskleysan heim. Skráin fyri kvøldið fevndi breitt og vendi sær bæði móti einstaklingum og fyritøkum. Undirtøkan var góð, og framløgurnar vóru kunnandi og spennandi. Samrøður, kjak og upplýsandi framløgur góvu luttakarunum nýggj amboð til at hugsa meira burðardygt í gerandisdegnum.

Afturat hesum hava vit framleitt fimm ”reels” ella stuttfilmar við heitinum ”Tak tað við tær”, sum við stuttum og fangandi boðum á sosialum miðlum varpa ljós á dálking, rudding og burðardygga atferð. Hetta hevur økt um okkara sjónligheit og fangað áhugan hjá fleiri, serliga yngri málbólkum.

Annika, samskipari okkara, er við í heimildarfilminum ”Saman”, sum Betri Trygging hevur framleitt. Filmurin setur við 10 samrøðum sjóneykuna á týdningin av samstarvi og av felagsskapi í burðardyggum verkætlanum.

Menning av samleika og heimasíðu

Ein týðandi broyting í ár var nýggi samleikin hjá Rudda Føroyar. Við nýggjum búmerki og grafikki hava vit styrkt okkara visuella samleika, soleiðis at vit standa sterkari sum ein skipað og professionell rørsla.

Ein íri, Devin Seward, var í starvsvenjing hjá okkum í 6 vikur, hann er lesandi á Trinity College í Dublin og skrivar eina verkætlan um plastdálking, serliga á strondum, og tí var hann eisini serliga upptikin av strandaruddingum, meðan hann var her. Hann luttók í tveimum strandaruddingum, sum eru partur av Nordic Coastal Cleanup, hevur skilt og vigað alt saman við samskipara okkara, Anniku. Hann ruddaði í Sandagerði eina ferð um vikuna og skrásetti ruskið.

Eisini hava vit ment heimasíðuna. Við hjálp frá Devin eru partar av heimasíðuni nú á enskum, soleiðis at útlendingar, sum vilja læra um okkara arbeiði og møguliga stuðla ella luttaka, fáa betri innlit.

Saman um rudding og kunnandi átøk

Í árinum skipaðu vit fyri fleiri ruddingartiltøkum, eitt nú í samstarvi við GreenGate, sum saman við donskum ferðafólkum ruddaði í Kaldbaksbotni.

Vit hava lagt stóran dent á at kunna og upplýsa um umhvørvismál og týdningin av rudding. Niels, sum umsitur heimasíðuna, hevur arbeitt miðvíst við at leggja út samrøður og annað tilfar, soleiðis at fleiri fáa høvi at fylgja við í okkara virksemi.

Vit hava eftir áheitan havt framløgur fyri IRF og fyri Rotary um okkum, og hvørjum vit arbeiða fyri og við. Annika, samskipari okkara, greiddi frá. Hetta er liður í at skapa størri tilvit og at eggja fleiri at gerast virkin í umhvørvisarbeiði.

Altjóða samstarv og luttøka á ráðstevnum

Umframt limaskap í Let’s Do It World eru vit eisini við í norðurlendskari strandarudding, Nordic Coastal Cleanup (NCC). NCC er samstarv millum átta Norðurlond, sum saman vilja eggja til hugburðsbroyting viðvíkjandi umhvørvi, dálking og endurnýtslu, har málið er at savna sjálvboðin at rudda burturkastið við strendur, inni í landinum, fram við áum og vøtnum um øll Norðurlond.

Á hvørjum ári hittast umboð fyri hesi londini á fundi, har Annika og Beinta hava umboðað okkum. Ein stór uppliving var at luttaka á ráðstevnu í Keypmannahavn saman við NCC. Hetta gav okkum møguleika at knýta sambond, læra frá øðrum og deila okkara royndir úr Føroyum við norðurlendskar umhvørvisfelagsskapir.

Vit ruddaðu saman við starvsfólkum frá Havstovuni og Umhvørvisstovuni fram við Sandá og Yviri við Strond. Tilsamans 112 kilo av ruski.

Frá Hold Norge Rent hava vit fingið jakkar, ið hava gjørt tað bæði lættari og tryggari at arbeiða úti í náttúruni. Hetta er ein praktiskur og sjónligur stuðul, ið ger okkara ruddingartiltøk enn meira skipað og professionell – vit takka teimum fyri gávuna.

Altjóða talgildur ruddingardagur

Eins og undanfarin ár settu vit sjóneykuna á altjóða talgilda ruddingardagin, sum er í mars, tá ið vit heita á fólk um at rudda á elektronisku tólum sínum.

Í talgilda “heiminum” finst, eins og í fysiska heiminum, ein rúgva av óruddi, sum tekur pláss á okkara fartelefonum, teldum og servarum. Um vit strika alt óneyðugt innihald, sum tekur pláss, kunnu vit skerja okkara CO2-slóð sera nógv, tí internetið og alskyns cloud-skipanir dálka eins nógv og flogferðslan.

Niðurstøða

2024 hevur verið eitt ár við stórari menning og nýggjum møguleikum fyri Rudda Føroyar. Vit hava styrkt okkara samleika, ment okkara talgildu tilveru, skipað fyri fleiri ruddingartiltøkum og verið við í bæði lokalum og altjóða samstørvum. Arbeiðið er ikki liðugt, men við tí megnararbeiði, sum sjálvboðin og samstarvsfelagar hava lagt í átøkini, eru vit á rættari kós. 2025 fer at bera okkum fleiri spennandi møguleikar, og vit gleða okkum at halda fram við at rudda, kunna og broyta vanar saman við øllum tykkum, sum vilja gera mun!

Vit í Rudda Føroyar takka øllum, sum á ein hvønn hátta góvu sítt íkast til ruddingarátakið í 2024. Eins og hini árini høvdu vit gott samstarv við kommunurnar, ið m.a. ger, at burturbeiningin kann fara fram í samstarvi við IRF og kommunalu brennistøðina hjá Tórshavnar kommunu uttan hóvasták og uttan kostnað fyri Rudda Føroyar.

Uttan fíggjarligan stuðul hóra vit ikki undan, so eins og undanfarin ár bleiv søkt um stuðul, og hava hesi stuðlað arbeiði okkara í 2024:

• Hiddenfjord, Høgra, Articon, Visit Faroe Islands, Raska/MBM,
• Christian í Grótinum, Framherji, Sev, Articon, Elektron, Varðin,
• Nomatek, Greengate, Tórshavnar kommuna, SNA, Sjógæti, Hotel Brandan,
• Norðurlandahúsið, Betri Stuðul, Base, Útirok.

Heinta pdf fíla av ársfrágreiðingini

Vit takka hjartaliga fyri stuðulin.

The post Ársfrágreiðing fyri Rudda Føroyar 2024 appeared first on Rudda Føroyar.

Skrá sambært viðtøkum felagsins.

Øll eru vælkomin á fund, og eisini at koma upp í felagsskapin so ella so.

– Nevndin

The post Aðalfundur 2025 appeared first on Rudda Føroyar.